Кинотеката утре (петок) од 11 до 15 часот ќе дели бесплатни кинотечни печатени и ДВД изданија, а ќе има и организирана тура низ просториите и депоата на институцијата која се грижи за националното аудиовизуелно, односно филмско наследство, во чест на 27 Октомври, Светскиот ден на аудиовизуелно наследство.

Дел од изданијата на Кинотеката ќе добие и публиката на проекциите на македонските филмови „Те дуа, жими мене“ во режија на Марјан Гавриловски (18 часот) и „М“ на Вардан Тозија (20 часот).

Од Кинотеката велат дека цел октомври е посветен на заштитата на филмското наследство, неговата промоција и подобрување на условите во кое се чува од заборав и уништување, а заради негова достапност до граѓаните.

„Неодамна беше проширен и реновиран просторот во кој се чуваат изданијата и библиотечниот фонд на Кинотеката и дел од легатот на македонскиот режисер Димитрие Османли, а излезе и книгата ‘Документарниот филм и идентитетот’ на м-р Сунчица Симоновска-Веселиновска што ќе биде промовирана наскоро. Македонската кинематографија во овој месец беше преставена пред црногорската, хрватската и српската публика, во издвоени настани, а филмовите на Браќата Манаки влегоа во официјалната програма на Фестивалот на архивски филм кој се одржа во Тбилиси, Грузија“, вели Кинотеката.

Светскиот ден на аудиовизуелно наследство е востановен во чест на донесувањето на Препораката за заштита и зачувување на подвижните слики од страна на 21. Генерално собрание на УНЕСКО во 1980 година. Три ипол децении подоцна, УНЕСКО ја дополни и прошири таа првична препорака со нова, и во 2015 година беше усвоена Препораката за зачувување и достапност на документарното наследство, вклучително и она во дигитална форма.