Советникот Ќирил Гајдов од СДСМ поднесе оставка во Советот на Општина Велес, потврди тој за СКАДАКАЖАМ.МК. Неговото образложение е дека треба да се најдат нови лица на политичката сцена, по катастрофалниот пораз на СДСМ на парламентарните и претседателски избори.

„Време е да дојдат нови помлади кадри. Оваа моја оставка треба да е мотив, директно или индиректно инволвираните учесници во ваквиот тежок и срамен пораз, да заминат. СДСМ е голема партија, која носела големи одлуки кои луѓето не ги препознаа. Имаа можност да се европеизираат, одлучија да се антиквизираат, да гледат во ретровизор наместо во иднината“, кажа Гајдов кој е координатор на советничката група а СДСМ.

Тој во претходниот состав на Советот на Општина Велес од септември 2020 до октомври 2021 беше преседател на Советот. Следен на кандидатската листа на СДСМ за локалните избори 2021 беше Трајче Миланов. Неговиот мандат треба да го верификува Советот на Општина Велес, откако по поднесената оставка од Гајдов, локалната власт се обраќа писмено до ОИК Велес, која ги информира кој е следен на канидатската листа.

П. ПЕЧКОВ