Словачкиот премиер Роберт Фицо се појави во јавност за првпат од атентатот врз него во мај, при што одржа говор во замокот Девин близу Братислава, во кој ги славеше словенските и христијанските корени на земјата.

Тој исто така ја пофали мировната посета на Виктор Орбан на Киев и Москва, каде што разговараше со Володимир Зеленски и Владимир Путин. Фицо е еден од ретките европски лидери кои не ја осудија средбата на Орбан со Путин.

„Доколку здравјето ми дозволуваше, многу ќе сакав да му се придружам“, кажа Фицо.

Тој беше застрелан четирипати на 15 мај, по што итно беше опериран и неколку недели помина во болница. Се очекува да има трајни последици по здравјето.

Бројни министри, пратеници и амбасадори присуствуваа на настанот во замокот Девин со кој беше одбележан 5 јули, националниот празник во Словачка и Чешка посветен на Кирил и Методиј.

„Луѓето кои биле овде во деветтиот век се наши предци“, кажа Фицо, алудирајќи на Кирил и Методиј, кои дошле во Велика Моравија во 863 година.

„Кирил и Методиј се вклучени во нашиот устав. Словачка треба да биде демократска, суверена, еколошка и социјална држава, но треба да биде и нормална. Таа нормалност ја обезбедува духовното наследство на Кирил и Методиј“, рече Фицо.

Тој го спротивстави таквиот културен конзервативизам со, како што кажа, бесмислените прогресивни и либерални идеологии кои се шират како рак и се како отров. Додаде дека има намера да го промени уставот за да се создаде уште посилна бариера за либерализмот.