Службите за вонредни состојби ја зајакнуваат одбраната од поплави во Централна и Источна Европа, откако поради поројните врнежи реките надојдоа и оштетија илјадници домови. Едно лице се удави во Полска, потврди денеска премиерот Доналд Туск. Во бурата Борис, вчера во Романија загинаа четири лица во поплавите во југоисточниот регион Галати.

Во Чешка, поради поплавите имаше евакуации на жителите, а 51.000 домаќинства во северните области на земјата останаа без струја, соопшти чешката електроенергетска компанија ЧЕЗ. Бариерите против поплави се зголемија и во главниот град Прага.

„Повторно се соочуваме со ефектите од климатските промени, кои се сè поприсутни на европскиот континент, со драматични последици“, изјави вчера романскиот претседател Клаус Јоханис.

Екстремните врнежи стануваат се поверојатни во Европа, како и во поголемиот дел од светот, поради климатските промени. Потопла атмосфера може да задржи повеќе влага, што може да доведе до пообилни врнежи.

Во Краков, вториот по големина град во Полска, на жителите им се понудени вреќи со песок за заштита од поплави. Говорејќи од градот Клоѓко, една од најтешко погодените области во Долна Шлезија во близина на границата со Чешка, Туск рече дека 1.600 луѓе во областа биле евакуирани. Тој ги повика другите жители да соработуваат со службите за итни случаи кога ќе биде побарано да се евакуираат од своите домови. Во областа, 17.000 луѓе се без струја, рече тој. На некои локации сигналот на мобилниот телефон не работи и интернетот е прекинат, па тој рече дека донел одлука да се користат сателитите Старлинк.

Во Чешка, вчера пукна брана во регионот Јужна Бохемија. Министерот за животна средина Петр Хладик ги повика оние во најтешко погодените области да се подготват да ги напуштат своите домови. Хладик рече дека почвата е заситена и дождовницата останува на површината – зголемувајќи го ризикот од поројни поплави. Дожд во Чешка се очекува до вторник, рече министерот.