Првиот Ден на италијанскиот спорт во светот се одбележа денеска и во Градски парк во Скопје, а акцентот беше ставен на фудбалот, еден од најпопуларните спортови во оваа земја.

Се играше фудбал, се претставуваа најуспешните италијански фудбалски клубови, а италијанскиот амбасадор Андреа Силвестри делеше подароци.

Беа изложени навивачки реквизити на Јувентус, Интер, Милан, Лацио, Наполи и Рома (Фото: К. Попов)

Денот на италијанскиот спорт во светот е нов настан што го промовира Министерството за надворешни работи и меѓународна соработка на Италија, во соработка со италијанското Министерство за спорт и италијанскиот Национален олимписки комитет. Настанот во Скопје го организираше Амбасадата на Италија.

Италијанскиот амбасадор Андреа Силвестри делеше подароци (Фото: К. Попов)

По тој повод беше претставено новоформираното здружение на македонски фан клубови на италијанските фудбалски екипи „Навивачи Калчо Триколоре“, при што беа изложени дресови, знамиња, шалови и други навивачки реквизити на Јувентус, Интер, Милан, Лацио, Наполи и Рома.