Полицијата го уби мажот кој со камионет удри во поголема група луѓе кои славеле Нова година во историскиот дел на Њу Орлеанс, при што загинаа најмалку десет луѓе, а повеќе од 35 се повредени. ФБИ кажа дека го истражува нападот како можен чин на тероризам, додека јавниот обвинител на Луизијана го означи инцидентот како брутален намерен масакр.

Убиецот е идентификуван како 42-годишниот жител на Тексас Шамсуд-Дин Џабар и ФБИ кажа дека во неговото возило биле пронајдени знаме на Исламска држава и експлозивна направа.

„Овој маж се обиде да прегази што е можно повеќе луѓе. Неговата намера беше да направи масакр“, изјави шефицата на полицијата на Њу Орлеанс, Ен Киркпатрик.

Нападот се случи на пресекот на популарните улици Канал и Бурбон во историскиот Француски Кварт за време на прославата на Нова година. Овој дел од градот привлекува голем број туристи со своите барови и музика.

„Напаѓачот успеа да помине околу барикадите и пукаше кон полицијата од возилото откако се судри. Притоа рани двајца полицајци, кои се во стабилна состојба. Тој е убиен во престрелката со полицијата“, кажа Киркпатрик, додавајќи дека неговиот мотив не е познат.

Градоначалничката на Њу Орлеанс, Латоја Кантрел, го опиша инцидентот како терористички напад.