Нов директор на гимназијата „Ванчо Прќе“ во Виница е професорот по спорт и физичка култура Зоранчо Ангелов, откако градоначалникот на Виница Миле Петков на 14 јануари ја верификувал одлуката на Училишниот одбор за изборот врз основа на јавен оглас. Лани во октомври, поголем дел од професорите цел месец ја бојкотираа наставата зашто градоначалникот незаконски назначи нивна колешка за в. д. директорка.

• НАСТАВНИЦИТЕ ОД ГИМНАЗИЈАТА ВО ВИНИЦА ЈА БОЈКОТИРААТ НАСТАВАТА ЗАШТО ГРАДОНАЧАЛНИКОТ НАЗНАЧИ НОВА В. Д. ДИРЕКТОРКА, ВЕЛАТ ЌЕ ИМА НАСТАВА КОГА ЌЕ ИМА ЈАВЕН ОГЛАС ЗА ИЗБОР

Колективот сега соопшти дека незаконски назначена и за нив непожелна в. д. директорка сега е разрешена и на нејзино место за нов директор со 4-годишен мандат е назначен нивниот долгогодишен колега Ангелов без политички заднини или мотиви и тие се задоволни со сегашното решение.

• ПРОДОЛЖИ НАСТАВАТА ВО ГИМНАЗИЈАТА ВО ВИНИЦА, ПРОФЕСОРИТЕ ГО СТАВИЈА БОЈКОТ ВО МИРУВАЊЕ ДО 8 НОЕМВРИ

„По многу перипетии, претрпени неправди и притисоци врз вработени и нивните семејства од колешката која е професор по македонски јазик и литература, сплотениот мнозински дел од колективот упорно настојуваше неправдите да бидат остранети и назначувањето на нов директор за нас, всушност, значи победа на демократијата“, се вели соопштението.

Професорите велат дека „по еден макотрпен период“ успеале да покажат и докажат дека „само со сплотеност и обединетост може да има правда и напредок“.

„Се надеваме дека ќе бидеме пример и зрак надеж за сите коишто се чувствуваат како жртви на системот, како што бевме и ние“, се вели во соопштението.

Т. ЈОВАНОВСКИ