Еколошката акција на засадување на јаворови садници која ќе се одржи утре (26 јануари) во манастирскиот комплекс „Света Богородица Балаклија“ во Делчево е во организација на Планинарскиот спортски клуб „Голак“ од овој град. Македонскиот сатиричар Миле Ѓорѓијоски донира 68 садници јавор во чест на својот 68. роденден, а „Голак“ ќе засади плус 11 јавори садници во чест на 11-годишнината на клубот. Кон акцијата се придружуваат и невладината организација „Жена“ и пекарата „Луна гив“ од Делчево.

„Планирам во наредните години да издавам најмалку по една книга со афоризми, а во иднина секоја година ќе посадувам по една садница повеќе во знак на моите години и посакувам оваа хумана и еколошка акција да стане семејна традиција која ќе ја продолжат моите деца и внуци“, вели Ѓорѓијоски.

Ѓорѓијоски важи за еден од најпродуктивните македонски сатиричари, автор е на првата светска антологија на мудри мисли, поговорки и афоризми од антиката до денес, а пред неколку години со неговото 35-то издание на книга со 1.000 аформизми го заокружи своето творештво со објавени над 15.000 афоризми, досетки и разни мудри мисли од сите области, од политика до спорт.

Тој има напишано книги со афоризми и за деца, а во изминатаите години работеше на второто издание на мудри мисли, поговорки и афоризми на познати светски филозофи, писатели, музичари, политичари и афористичари, на личности како Аристотел, Соломон, Ниче, Линколн, Ганди, Леонардо да Винчи, Пушкин, Моцарт, Андриќ,како и македонските великани Блаже Конески, Петре М. Андреевски, Влада Урошевиќ и други. Автор е и на едицијата „Од Вардар до Владивосток“ која содржи избрани афоризми од афористичари од Србија, Русија и Македонија.

Тој е во организацијата и на меѓународниот фестивал „Јаков од Камена Река“ кој се одржува во Македонска Каменица во чест на првиот македонски печатар.

Т. ЈОВАНОВСКИ