Александар Лукашенко го продолжи своето 31-годишно владеење во Белорусија откако државната изборна комисија го прогласи за победник на вчерашните претседателски избори, што западните влади ги отфрлија како лажни.

„Можете да ѝ честитате на Република Белорусија, избравме претседател“, изјави шефот на државната изборна комисија Игор Карпенко.

Лукашенко, кој немаше сериозен конкурент на изборите, го освои седмиот мандат со 86,8% гласови. Европските лидери кажаа дека изборите не биле ни слободни, ни правични зашто независните медиуми во земјата се забранети и на ниеден опозиционер не му беше дозволено да се кандидира. Официјални лица кажаа дека излезноста била 85,7%.

„Граѓаните на Белорусија немаа избор“, изјави германската министерка за надворешни работи Аналена Бербок.

И САД и ЕУ кажаа дека не го признаваат Лукашенко за легитимен претседател на Белорусија откако тој им нареди на безбедносните сили да ги разбијат масовните протести по изборите во 2020. Групата за човекови права „Вjасна“ кажа дека во земјата и натаму има 1.250 политички затвореници, иако Лукашенко ослободил околу 250 минатата година.

Војната во Украина уште повеќе ги зближи Лукашенко и Путин, кој распореди тактичко нуклеарно оружје во Белорусија.