Во Неготино денеска се одржа протест за правда за 22-годишната Фросина Кулакова, која беше прегазена од Васил Јованов на 29 јануари на пешачки премин на „Партизанска“ во Скопје.

На протестот зборуваше нејзината сестра Росица Кулакова , која кажа дека коренот на сите проблеми во општеството доаѓа од судскиот систем.

„Доколку судијката му го продолжила притворот сè до правосилност на одлуката, а по вчерашната одлука на Апелација тој само ќе беше спроведен во затвор, мојата сестра Фросина денес ќе беше жива. Затоа бараме одговорност и од судијката Даниела Алексовска Стојановска“, кажа Росица на протестот во нивниот роден град.

Апелациониот суд Скопје вчера соопшти дека ја преиначило првостепената пресуда на Васил Јованов за поседување и продажба на дрога, па така тој сега е правосилно осуден на три години и десет месеци затвор.

Според првостепената пресуда, тој требаше да биде упатен во воспитно-поправен дом, а до правосилност на пресудата беше пуштен на слобода.

Јованов сега се наоѓа во притвор во Шутка.