Претседателот на Украина Володимир Зеленски денеска се сретна со премиерот на Велика Британија Кир Стармер во Лондон по неговата посета на Белата Куќа во петокот.

Стармер ја повтори поддршката на Велика Британија за Украина, изјавувајќи: „Ќе стоиме со Украина колку што е потребно.”

„Како што слушнавте од извиците на улицата, имате целосна поддршка ширум Велика Британија и ќе стоиме со вас, колку што е потребно“, му кажа Стармер на Зеленски.

Тој зборуваше и за „непоколеблива решителност” за постигнување траен мир за Украина.

Зеленски му се заблагодари на Стармер за неговата поддршка, и му се заблагодари на кралот Чарлс што прифатил средба со него утре.

„Среќни сме што имаме такви партнери и такви пријатели”, рече тој.

Претходно, генералниот секретар на НАТО Марк Руте кажа дека вчерашната караница меѓу Трамп и Зеленски била „несреќна“ и дека двајцата треба да си го поправат односот.

„Јас двапати се слушнав со претседателот Зеленски. Му кажав дека мораме да се држиме заедно, САД, Украина и Европа за да донесеме траен мир во Украина“, кажа Руте, додавајќи дека мора да му се оддаде почит на Трамп за тоа што го направил за Украина.