Прес-конференцијата за јубилејните активностите по повод 80-годишнината на Универзитетската библиотека „Св. Климент Охридски“ од Битола и проектите финансирани од државата, прерасна во обвинувања за известувањето на САКАМДАКАЖАМ.МК за случувањата во институцијата. Светлана Талеска, претседателка на Дисциплинската комисија на Библиотеката, која на прес-конференцијата беше заедно со менаџерскиот тим, јавно ја критикуваше нашата дописничка од Битола, кажувајќи ѝ кого требала да побара за текстот објавен на 5 март дека библиотеката е опоменета од Трудовата инспекција зашто не им кажала на вработените како да се заштитат од мобинг на работно место.
„Прочитав во порталот Сакамдакажам дека Библиотеката е опоменета од Трудовата инспекција дека вработените не биле опоменети за правата и должностоите кои ги имаат. Но, не побаравте одговор од нас. Во изминатите години, јас сум тука 31 година, досега ниту еднаш од претходното раководство не добивме никаков правилник, насочувања, совети кои се нашите права, каде можеме да се обратиме при мобинг“, рече Талеска.
САКАМДАКАЖАМ.МК повеќе од еден месец известува за случувањата во Библиотеката, каде на осум месеци пред пензија од работната просторија беше иселена програмската раководителка Јелена Петровска, која беше дел од претходното раководство од времето на СДСМ, а потоа беше и казнета со 30 проценти од платата во траење од шест месеци, односно до пензија, зашто според Дисциплинската комисија, не водела грижа за чувањето на библиотечниот фонд. Во нтекстовите беа цитирани и Петровска и претходниот в. д. директор Менде Доневски, во чие време се случи настанот. Потоа, продолживме да ја истражуваме темата, при што од Трудовата инспекција ни беше пратен одговор дека установата е опоменета зашто не ги известила работниците за мерките и постапките за заштита од вознемирување на работно место. Во одговорот не пишуваше дека установата има право на жалба, поради што немаше потреба повторно да се бара Библиотеката да ја коментира одлуката на инспекцијата, а воедно таа беше спроведена и во следните денови.
Прес-конференцијата ја држеше новата директорка Емилија Стефановска-Давкова, која самата кажа дека е ќерка на поранешна директорка на установата, експратеничката од ВМРО-ДПМНЕ Анета Стефановска, и дека сака да придонесе за развој на библиотеката, а за тоа важно ѝ е да ја интензивира сорботката со медиумите. На прес-конференцијата беше повикан менаџерскиот тим, но не и програмската раководителка Јелена Петровска, иако беше посочувана со име и презиме дека направила огромна штета зашто не се грижела за библиотечниот фонд.
„Штетата е огромна, зашто има стари раритетни книги кои биле чувани во влага и оштетени, а тие во светот се најдобро чувани. Заседаваше дисциплинскиата комисија каде вработената Петровска беше санкционирана, Управниот одбор ја потврди санкцијата. Мојот претходник кажува дека години наназад било укажувано за потребата од нов магацински простор и метални конзоли за правилно да може да се чува библиотечната граѓа. Но, наместо тоа се креирала Дневната соба, што не велам дека не е добар простор за читателите, но основата на постоењето на библиоетаката е правилното чување на книгата“, рече директорката Стефановска-Давкова.
На нашето прашање дали Петровска поради тоа била иселена од канцеларијата, таа ни одговори дека тоа не е канцеларија туку просторија за музикалии и дека таа претходно имала постапено исто кон друг програмски раководител. Прашавме дали ова е реваншизам кон неа, Стефановска-Давкова рече дека не би требало да биде. Рече дека пред Трудовата инспекција ѝ понудила на Петровска друга канцеларија, но таа одбила.
„Едниот инспектор се повика дека е ненадлежен во однос на условите за квалитет во работењето, а другиот потврди дека се исполнети минималните услови според правилникот за квалитет и бебзбедност при работењето“, рече директорката.
Беше кажано дека книгите донирани од Владата се оштетени зашто биле чувани во кутии во визба.
Петровска, која веќе ја тужи Библиотеката, прашува зошто не беше повикана како програмски раководител на пресот. Вели дека според систематизацијата на работни места, програмски раководител и двајца други раководители имаат идентични задачи, а казнета е само таа.
„Одговорноста за донесување одлуки е на директорот, не на програмскиот раководител. Постои обемна документација која ќе биде предмет на вештачење на суд од записници од Стручен совет, Управниот одбор, состаноци по Оддели каде е укажано на проблемите со сместување на библиотечната граѓа. Книгите од Владата се попишани и уредно чувани во просторија, но уште од времето пред јас да бидам в. д. директор, на полици беа сместени во подрумските простории. Уште во 2017 година, изработив документ од Мнистерствотѕо за култура за намалување на цените на книгите за да можат да се продаде вишокот книги. Беа офарбани ѕидовите во магацинот за книги, набавени полици, има докази за тоа во годишни извештаии, постојано се барани проекти за заштита на фондот и Министерството ги одобруваше по потреба“, вели Петровска.
Директорката Стефановска-Давкова рече дека силно ќе се залага за модернизација на Библиотеката, збогатување на книжниот фонд, поголем пристап на истражувачката и научната фела, соработката со универзитетите, зашто бројот на студенти читатали опаднал на 133, дигитализација на материјалите, изработка на монографски публикации и меѓународна соработка, при што во Националната библиотека во Рим ќе претстават 30 нивни публикации и репродукции на слики од најстарите библиотеки во Битола и Битолско и уште многу други проекти.
Ж. ЗДРАВКОВСКА
