Владимир Путин ѝ наредил на руската војска да прекине со нападите врз украинската енергетска инфраструктура на 30 дена, објавија руските медиуми по неговиот телефонски разговор со Доналд Трамп попладнево.

Двајцата лидери разговараа по вторпат откако Трамп се врати во Белата куќа во јануари. Трамп претходно кажа дека, меѓу другото, ќе разговара со Путин за крај на војната во Украина.

Рускиот државен медиум „РИА новости“ објави дека тие имале детален и искрен разговор за ситуацијата во Украина, при што Путин изразил посветеност кон мирно решение на конфликтот.

„Путин одговорил позитивно на идејата за прекин на нападите врз објектите на енергетската инфраструктура во рок од 30 дена и ѝ дал наредба на руската војска да го спроведе ова“, објави „РИА новости“.

Путин „одговорил конструктивно“ на предлогот за прекин на огнот на Црното Море, при што се очекуваат дополнителни преговори за ова прашање.

Исто така, Москва и Вашингтон договориле да се формираат експертски групи кои ќе работат на решавањето на украинската криза.

Според „РИА новости“, Путин и Трамп разговарале и за ситуацијата на Блиски Исток и Црвено Море и изразиле заемен интерес за нормализирање на односите помеѓу двете држави.