Суд во Јужна Дакота ја прогласи еколошката организација „Гринпис“ за виновна за клевета и ѝ наложи да ѝ плати отштета од 660 милиони долари на нафтена компанија поради учеството во еден од најголемите протести против фосилни горива во историјата на САД.

Компанијата од Тексас „Енерџи трансфер“ исто така го обвини „Гринпис“ за неовластено влегување на имот, вознемирување и за граѓански заговор во врска со демонстрациите против гасоводот „Дакота аксес“ пред речиси десет години. Во судската тужба стоеше дека „Гринпис“ организирал насилна и незаконска шема за да се нанесе финансиска штета на „Енерџи трансфер“.

„Гринпис“, кој најави жалба, предупреди дека ова би можело да го доведе до банкрот и да стави крај на над 50 години активизам.

Протестите против гасоводот близу индијански резерват привлекоа илјадници луѓе, но „Гринпис“ тврдеше дека не ги предводел демонстрациите, туку локални домородни лидери, кои се противеа на гасоводот. Треј Кокс, еден од адвокатите на „Енерџи трансфер“, кажа дека активностите на „Гринпис“ ѝ предизвикале штета на компанијата меѓу 265 и 340 милиони долари и побара соодветно обесштетување.

Протестите, кои беа проследени со насилства и вандализам, траеја од април 2016 до февруари 2017, кога Националната гарда и полицијата ги избркаа демонстрантите. На врвот на протестите, на самата локација имало 100.000 демонстранти, меѓу кои и воени ветерани, актери и политички лидери. И покрај тоа, гасоводот почна со работа во 2017.