Инспектори за патен сообраќај при Државниот инспекторат за транспорт спровеле 138 контроли во изминатите три дена, при што се утврдени неправилности кај 21 правно и физичко лице. На прекршителите им се изречени соодветни казни, соопшти Министерството за транспорт.
Инспекциските надзори се спроведени согласно Акцискиот план на Инспекторатот, а за констатираните неправилности ќе бидат информирани и Министерството за внатрешни работи и Јавното обвинителство за натамошно постапување.
Од Инспекторатот ги соопштија 11-те правни лица кај кои се констатирани неправилности и за кои се изречени казни. Станува збор за „Дурмо турс“ од Гостивар, „Дени интернационал“ од Илинден, „Свис мак алигега“ од Гостивар, „Зем промет – компани“ од Сарај, „Словин Билјана“ од Охрид, „Бис“ од Охрид, „Пештер“ ДОО од Чаир, Димитриоски од Гази Баба, „Хисари-ГД“ од Дебар, „Инком бизнис“ од Куманово и „Палас експорт-импорт“ од Гостивар.
Покрај овие 11 правни лица, неправилности биле констатирани и кај 10 физички лица кои вршат дејности за превоз на патници и стока.
Министерството за транспорт – Државен инспекторат за транспорт вели дека согласно донесениот Акциски план за инспекциски надзори при превоз на патници и стока, од утре инспектори ќе спроведуваат секојдневни интензивни инспекциски контроли над превоз на патници и стока, проверка на документи (лиценци, изводи од лиценци, дозволи, сертификати за професионална компетентност на возач, тахографи), надзор на безбедноста во сообраќајот и спречување нелегален превоз.
