Американскиот потпретседател Џеј-Ди Венс ја обвини Данска дека го оставила Гренланд ранлив на можни упади на Кина и Русија и го повика тамошниот народ да склучи договор со САД.
При вчерашната посета на Гренланд, Венс не ги повтори неодамнешните закани на Доналд Трамп дека ќе го преземе островот со сила. Место тоа, тој ги повика жителите на Гренланд да ги прекинат врските со Данска, тврдејќи дека таа не вложила доволно во неговата заштита.
Гренланд првично требаше да го посети само сопругата на Венс, Уша, која планираше да присуствува на традиционална трка со санки и кучиња, што предизвика голем револт на островот и беа најавени протести. Место тоа, Џеј-Ди и Уша Венс останаа само неколку часа и ја посетија само вселенската база Питуфик, оддалечена 1.500 километри од главниот град Нук.
Венс ја искористи можноста да ја нападне Данска, тврдејќи дека таа морала „да го чува народот на Гренланд од многу агресивни упади од Русија, Кина и други нации“, без да даде дополнителни детали.
„САД нема да употребат воена сила за да го земат Гренланд од Данска. Место тоа, ги повикуваме жителите на Гренланд да се одлучат за самоопределување и да ги прекинат врските со Данска. Мислам дека ќе можеме да склучиме договор, во стилот на Доналд Трамп, за да ја осигураме безбедноста на територијата. Се надевам дека за партнер ќе ја изберете Америка зашто ние сме единствената нација на Земјата која ќе ги почитува вашите суверенитет и безбедност. Нашата порака до Данска е јасна: вие не завршивте добра работа за народот на Гренланд“, изјави Венс.
Огромно мнозинство жители на Гренланд се противат на идејата за анексија, покажа една анкета од јануари. Премиерот на Гренланд изјави дека американската посета покажува недостаток на почит, а и данскиот крал Фредерик го отфрли планот на САД.
Од 2009, Гренланд има право да распише референдум за независност и во последните години некои политички партии почнаа повеќе да се залагаат за него. Гренланд управува со своите внатрешни работи, но одлуките за надворешната и одбранбената политика се носат во Копенхаген.
