Повторно на површината на езерото Младост се појавија пластите отпадна растителна материја. Со сонцето и повисоките температури, кои ја загреаја површината на водата, се формираше органска слузава маса, која плива засега по крајбрежјето.

„Се потврди дека езерото Младост од езеро смарт стана езеро смрт. Прашањето е што ќе се преземе или што преземаат институциите“, вели Стевче Дечев, еко-активст од фондацијата „Импакт“.

Причината за појавата на овие пловни маси е нискиот, мал процент на кислород во водата, што не овозможува процес на дишење на живиот свет, и растителен и животински, па е во опасност од угинување. Ниските кислородни концентрации не овозможуваат нормално одвивање на процесот на деградација на органската материја, присутна во еко-системот.

На длабочина од 14 метри не е измерено присуство на кислород во ниските слоеви на водата. Во текот на зимата оваа маса се разгради, потона, а дел остана на суво со повлекувањето на водата. Претходно кога почна да се распаѓа, се појавија пена на брегот и мирис на амонијак. Во однос на површинската наслага која плива по водата, од Хидробиолошкиот завод во Охрид препорачаа нејзино механичко отстранување. Како спас за акумулацијата се наведува дека е потребно снабдување на езерото со свежа вода и со кислород.

„Се предвидуваат багерирање на самото езеро Младост, чистење на алгата и дотур на вода. Пред сè аерација, која е најевтин процес и може брзо да започне“, кажа Даниел Наумовски, претседател на ЗСР „Бабуна“ од Велес, дел од координативното тело кое треба да помогне да се спаси вештачката акумулација.

Од октомври е забрането водата од езерото да се користи за полевање на околните лозови насади. Во малиот залив на Отовичка Река со години нема риба.

„Рибата ја снема, не се лови. Вака не било никогаш, како да изумре. Ни отиде езерото ако не се преземе нешто бргу“, кажа рибар кој со години ловел риба во овој дел.

Германската банка, од каде е подигнат кредитот за изгpадба нa цевководот кој требаше да ги спои двете езера Лисиче и Младост, по извршена анализа констатирала дека не смее да се мешат водите од двете езера поради опстанокот на екосистемот и доградбата сопре.

П. ПЕЧКОВ