Судењето за грабнувањата и убиствата на 14-годишната Вања Ѓорчевска и велешанецот Панче Жежовски денеска продолжи со сведочење на првообвинетиот Љупчо Палевски-Палчо, кој тврдеше дека доказите презентирани од обвинителството се нецелосни, манипулативни и фалсификувани.
Тој тврдеше дека не го познавал убиениот Панче Жежовски. Палевски рече дека според доказите што тој ги поседува, меѓу Жежовски и сообвинетиот Велибор Манев постоела десетгодишна нетрпеливост и омраза, што било „многу повеќе од недоразбирање за бекатон“.
Во својата одбрана, Палевски укажа и на, според него, недоследности во видео-снимките презентирани од Обвинителството, За снимките презентирани од обвинителството, тој кажа дека имаат неточни временски записи и, според него, обидите на обвинителството да ги потврди овие докази преку исказите на другите обвинети биле неуспешни поради контрадикторности во нивните сведочења за времето и начинот на настаните поврзани со убиството на Жежовски.
Палевски е последниот сведок на судењето. Претходно беа сослушани сведоците на обвинителството, таткото на Вања, Александар Ѓорчевски, и останатите обвинети. Велибор Манев во својот исказ ги опиша грабнувањата и убиствата и го посочи Палевски како главен организатор. Боре Видевски негираше учество, а Влатко Кешишев тврдеше дека најчесто чувал стража и не бил директен сведок на настаните.
Обвинети за киднапирањата и убиствата на Панче Жежовски и Вања Ѓорчевска се Љупчо Палевски, Боре Видевски, Велибор Манев, Влатко Кешишев и Александар Ѓорчевски.
