Прелиминарните резултати од парламентарните избори во Албанија покажуваат убедливо водство на владејачката Социјалистичка партија на премиерот Еди Рама (60), со што тој е на пат да обезбеди четврти последователен мандат и продолжување на патот кон членство на земјата во Европската Унија.

Од преброени 25 отсто од гласовите, Социјалистичката партија освоила 53 проценти, додека опозициската коалиција предводена од Демократската партија на Сали Бериша (80) добила 35 проценти. Според овие бројки, социјалистите се очекува да освојат најмалку 71 пратеничко место, повеќе од актуелниот состав и доволно за самостојно формирање влада.

Излезноста на изборите изнесувала 42,16 проценти, што е за четири процентни поени помалку од излезноста на претходните избори пред четири години. Право на глас имаа околу 3,7 милиони граѓани, и покрај тоа што Албанија има приближно 2,8 милиони жители, поради големата емиграција. За првпат, гласањето беше овозможено и за 191.000 албански државјани во дијаспората, кои можеа да гласаат по пошта.

Претседателот на Централната изборна комисија, Илирјан Целибаши, изјави дека изборниот ден поминал во мирна атмосфера, со изолирани неправилности кои нема да влијаат врз конечните резултати.

„Во најголем дел, процесот се одвиваше согласно правилата и стандардите“, изјави тој.

Социјалистичката партија во кампањата вети забрзување на процесот за членство во Европската Унија заради завршување на преговорите до 2027 година и добивање согласност од сите земји-членки до 2030 година. Во предизборната реторика, Рама ги наведе и досегашните постигнувања во инфраструктурата и правосудните реформи, како и планови за зголемување на пензиите и платите.

Партијата најави и амбициозен план за зголемување на бројот на туристи од 10 милиони во 2024 година на 30 милиони до крајот на деценијата, преку проширување на инфраструктурата и нови туристички дестинации.

Главен опонент на Рама беше поранешниот претседател и премиер Сали Бериша, кој водеше кампања налик на таа на поранешниот американски претседател Доналд Трамп, вклучително и ангажирање на негови советници.

Изборниот процес го следеа над 570 меѓународни набљудувачи од ОБСЕ и Советот на Европа.