Италијанскиот суд стави една единица на модниот бренд „Валентино“ под судска управа на една година, откако откри злоупотреба на работници во неговиот синџир на снабдување, во последниот од низата случаи што го извалкаа имиџот на луксузните брендови во Италија. Единицата за чанти „Валентино бегс лаб“ е четвртата модна компанија која е осудена од истиот суд во Милано за слични работни прашања од 2023 година. Под управа беа ставени и италијанската единица на францускиот луксузен гигант „ЛВМХ“, „Диор“, италијанската „Армани“ и италијанската компанија за чанти „Алвиеро Мартини“.
Судот утврди дека „Валентино бегс лаб“, која произведува чанти и артикли за патувања со брендот „Валентино“, го договарала производството во фирми во кинеска сопственост во Италија кои ги експлоатираат работниците, според пресудата на 30 страници. Судот во Милано утврди дека компанијата е „виновна што не успеала“ соодветно да ги надгледува своите добавувачи, а со цел да се стреми кон поголем профит. Судот сега ќе назначи надворешен администратор за да потврди дека компанијата ги исполнува сите барања на судиите да спроведе ефективни алатки за контрола на синџирот на снабдување.
Администрацијата ќе биде укината порано, ако единицата ги усогласи своите практики со законските барања, како што беше случајот со трите компании кои претходно беа осудени.
„Валентино“ е во мнозинска сопственост на катарскиот инвестициски фонд „Мајхула“. Француската модна група „Керинг“ купи 30% од акциите на италијанскиот бренд во 2023, со опција за купување на целиот акционерски капитал до 2028 година. „Валентино“, „Валентино бегс лаб“ и „Керинг“ не одговорија на барањата на Ројтерс за коментар. „Мајхула“ не беше достапна за коментар.
Во својата пресуда, судиите од Милано напишаа дека и покрај тоа што за претходните случаи нашироко се известуваше, „’Валентино бегс лаб’ продолжи да работи со добавувачи кои ги експлоатираат работниците и користат работна сила со кршење на безбедносните прописи, без на кој било начин да ги зголемат своите контролни системи“. Обвинителите во случајот рекоа дека кршењето на правилата меѓу модните компании во Италија е „генерализиран и консолидиран метод на производство“.
Италија е дом на илјадници мали производители кои сочинуваат 50%-55% од глобалното производство на луксузни стоки, пресмета консултантската компанија „Баин“.
