Односите меѓу поранешниот американски претседател Доналд Трамп и бизнисменот Илон Маск отворено ескалираа, при што двајцата разменија навреди откако технолошкиот милијардер ја критикуваше една од клучните домашни политики на Трамп. Расправијата се разгоре во четвртокот, кога двајцата милијардери си упатуваа остри зборови на социјалните мрежи кои ги поседуваат, најавувајќи горчлив крај на нивното сојузништво.
Денот започна со изјава на Трамп дека е „разочаран“ од критиките на Маск за неговиот предлог-закон за даноци и трошење, сугерирајќи дека тоа може да биде крај на нивниот „одличен однос“. Маск потоа го обвини Трамп за „неблагодарност“, додавајќи: „Без мене, Трамп ќе ги изгубеше изборите“. По неколкучасовна расправија, Трамп се обиде да ја смири ситуацијата, велејќи за „Политико“: „Ох, во ред е. Сè оди многу добро, никогаш подобро“. Неговите соработници закажале телефонски разговор со Маск за денеска, објави истиот медиум.
Во текот на денот, Маск повторно објави твит во кој го повикa Трамп да поднесе оставка, тврдејќи дека неговиот глобален план за царини ќе предизвика рецесија во САД и без докази сугерираше дека Трамп се појавува во необјавени досиеја поврзани со покојниот сексуален престапник Џефри Епстајн. Белата куќа го осуди тврдењето на Маск, а портпаролката Каролин Ливит во соопштението изјави: „Ова е несреќна епизода од Илон, кој е незадоволен од „Големиот убав закон“ бидејќи не ги вклучува политиките што тој ги сакаше“.
Акциите на „Тесла“ паднаа за 14% во рок од неколку часа откако расправијата избувна во јавноста.
Се чини дека и Маск смета дека е потребно да се измазнуваат работите. Доцна во четвртокот, како одговор на објава од Бил Акман, истакнат поддржувач на Трамп, кој сугерираше дека двојката треба да се помири, тој напиша: „Не грешиш“.
Пресвртната точка во односот меѓу поранешниот претседател и неговиот некогашен сојузник дојде по неколку недели лобирање од страна на Маск против „големиот, убав“ предлог-закон за трошење на Трамп, кој беше усвоен од Претставничкиот дом на САД минатиот месец и чека гласање во Сенатот. Кратко откако ја напушти функцијата во Одделот за владина ефикасност (DOGE) по 129 дена, Маск на својата платформа „Икс” го нарече законот „одвратна гнасотија“ и објави: „Срам да им е на оние што гласаа за него: знаете дека згрешивте“.
