Затвореник избегал од француски затвор криејќи се во торбата на друг затвореник кој излегувал од затвор по отслужувањето на казната, изјавија властите за локалните медиуми. Затворската служба започна истрага откако човекот завчера избегал од затворот Лион-Корба во југоисточна Франција, според радиодифузерот БФМТВ.

Тој „го искористил ослободувањето на друг затвореник за да се скрие во багажот и да избега“, соопшти затворската служба во соопштението за новинската агенција АФП.

Француските медиуми објавија дека избеганиот затвореник отслужувал неколку казни и дека бил под истрага во случај поврзан со организиран криминал.

Според локалните медиуми, отворена е и судска истрага за можно „бегство како дел од организирана банда и криминален заговор“.

Минатиот месец, Адвокатската комора на Лион изрази загриженост за пренатрупаноста во затворот Лион-Корба. На 1 мај 2025, околу 1.200 лица биле притворени во затворот, кој има капацитет од 678 места, објави БФМТВ.