За три недели ќе заврши санацијата на кровот на базенот „Борис Трајковски“. Базенот беше затворен кон средината на април откако падна лајсна од таванот. Иако беше најавено дека ќе биде отворен за месец и пол, базенот сè уште е затворен. Пливачките клубови не работат, ниту граѓаните рекреативно можат да го користат.
Директорот на базенот Даниел Апостоловски вели дека поради административни работи се одложило распишувањето на тендерот, но во моментов градежните работи течат според предвидената динамика.
„Постапката за распишување на тендер и избор на фирма одзема време. Во моментов во базенот се работи. Рокот за санација на таванот е 6 недели и работите се одвиваат според предвидената динамика. Изведувачот има уште три недели да заврши со работа“, вели Апостоловски.
Апостоловски во април за САКАМДАКАЖАМ.МК изјави дека причина за паѓање на лајсна е тоа што во базенот не била целосна раконструкцијата во 2010 година.
Базенот беше реновиран во 2010 кога на власт беше ВМРО-ДПМНЕ, а директор на објектот беше Ратко Капушевски.
Капушевски е обвинет во случајот за злоупотреби во набавки на мазут и перење пари, со што е оштетен буџетот на државата за 167 милиони евра.
А. АНТЕВСКА
