Доналд Трамп страда од хронична венска состојба, објави Белата куќа за да ги смири шпекулациите во врска со фотографиите кои покажаа модринка на неговата рака.

„Откако неодамна му се појавило отекување на нозете, Трамп беше подложен на сеопфатно испитување, вклучувајќи васкуларно тестирање. Модринката на раката на Трамп одговара на оштетување на ткивото од често ракување. Тој зема аспирин како дел од стандардниот режим на кардиоваскуларна превенција“, изјави портпаролката на Белата куќа, Керолајн Ливит.

Седумдесет и деветгодишниот Трамп често истакнува дека има добро здравје и еднаш се опиша себеси како најздравиот претседател во историјата.

Неодамна откриената венска состојба кај Трамп се нарекува хронична венска инсуфициенција, која се јавува кога вените на нозете не успеваат да пумпаат крв до срцето, предизвикувајќи таа да се собира во долните екстремитети, кои потоа можат да отекуваат.

Ливит рече дека нема докази за длабока венска тромбоза или артериска болест и дека сите резултати од тестот се во нормални граници. Според лекарот од Белата куќа, Шон Барбабела, состојбата е бенигна и честа, особено кај луѓе над 70 години.

„Дополнителните тестирања не покажаа знаци на срцева слабост, бубрежна инсуфициенција или системска болест. Севкупно, Трамп е во одлична здравствена состојба“, кажа тој.