Во Јапонија денеска се одржа тивка молитва по повод 80-годишнината од фрлањето на атомската бомба врз Хирошима од страна на САД. Јапонскиот премиер Шигеру Ишиба присуствуваше на церемонијата, заедно со официјални лица од целиот свет и градоначалникот на Хирошима, Казуми Мацуи.

Мацуи предупреди на забрзан глобален тренд кон воено зајакнување и на идејата дека нуклеарното оружје е од суштинско значење за националната одбрана.

„Ова е грубо непочитување на лекциите што меѓународната заедница требаше да ги научи од трагедиите на историјата“, кажа Мацуи.

Втората светска војна заврши откако Јапонија се предаде по фрлањето на бомбите врз Хирошима и Нагасаки. Бомбите убија повеќе од 200.000 луѓе, некои од непосредната експлозија, а други од радијација и изгореници.

„Татко ми беше тешко изгорен и заслепен од експлозијата. Кожата му висеше од телото, не можеше ниту да ме држи за рака“, изјави преживеаниот од Хирошима, Шинго Наито, кој имал шест години кога бомбата го погодила неговиот град, при што загинале неговите татко, брат и сестра.

Во својот денешен говор, Мацуи рече дека Договорот за неширење на нуклеарно оружје е на раб на нефункционалност и ја повика јапонската влада да го ратификува Договорот за забрана на нуклеарно оружје, што стапи во сила во 2021. Повеќе од 70 земји го ратификуваа договорот, но не и САД и Русија. Јапонија, исто така, ја отфрли забраната, тврдејќи дека нејзината безбедност е зајакната од американското нуклеарно оружје.

Сатоши Танака, кој исто така ја преживеа атомската бомба, рече дека крвопролевањето во Газа и Украина денес го потсетува на неговото сопствено страдање.

„Гледајќи ги планините од урнатини, уништените градови, децата и жените што бегаат во паника, ми се враќаат спомени на она низ што поминав. Живееме покрај нуклеарно оружје што може да го уништи човештвото повеќекратно“, кажа Танака.