Доналд Трамп кажа дека планира да бара смртна казна за секој убиец во главниот град Вашингтон. Според него, тоа би била превентивна мерка.

Трамп нареди распоредување на стотици припадници на Националната гарда и на други федерални служби во Вашингтон за да се борат против „целосното беззаконие“ во градот, навестувајќи дека ова ќе го спроведе и во Чикаго, Балтимор и други градови. Градоначалничката на Вашингтон, Мјуриел Баузер, ги отфрли тврдењата на Трамп за криминалот, велејќи дека тој е во опаѓање од 2023.

„Ако некој убие некого во Вашингтон, ќе бараме смртна казна. И тоа е многу силна превенција“, кажа Трамп.

Повеќето убиства во Вашингтон се процесуираат според локалните закони, но обвинителите можат да побараат смртна казна за злосторства кои подлежат на федералните закони. Трамп не изнесе детали како би ја спровел промената.

Тој ја врати федералната смртна казна со извршна наредба потпишана на првиот ден по враќањето во Белата куќа. Во извршната наредба на Трамп, таа е опишана како суштинска алатка за одвраќање и казнување на оние кои извршиле најгрозоморни злосторства и акти на смртоносно насилство против американски граѓани. Последната федерална смртна казна во САД е извршена во јануари 2021.