Севернокорејскиот лидер Ким Џонг Ун ќе му се придружи на Владимир Путин на воена парада во Пекинг следната недела, што ќе биде негова прва меѓународна мултилатерална средба. Со парадата за Денот на победата на 3 септември, Кина ќе одбележи 80 години од предавањето на Јапонија и крајот на Втората светска војна.

Меѓу 26-темина странски шефови на држави и влади нема да има западни лидери, а од Европската Унија доаѓа само словачкиот премиер Роберт Фицо, според кинеското министерство за надворешни работи.

Потврдено е присуството и на иранскиот претседател Масуд Пезешкијан, белорускиот лидер Александар Лукашенко, српскиот претседател Александар Вучиќ, спикерот на јужнокорејскиот парламент Ву Вон-шик и претседателот на Индонезија, Прабово Субијанто.

Ова ќе биде првпат од 1959 година севернокорејски лидер да присуствува на кинеска воена парада. На последната парада за Денот на победата, одржана во 2015, Северна Кореја испрати еден од своите највисоки функционери. Ким последен пат го посети Пекинг во 2019.

Кина веројатно ќе го прикаже своето најново оружје, вклучувајќи авиони, тенкови и противдронски системи. Ова ќе биде првпат новата структура на кинеската војска да биде целосно претставена на парада. Се очекува десетици илјади војници, офицери и воени ветерани да маршираат во формација на историскиот плоштад Тјенанмен.

Седумдесетминутната парада, што ќе ја надгледува претседателот Шји Џинпинг, внимателно ќе ја следат аналитичари и западни сили.

Парадата ќе се одржи една недела пред можната посета на Доналд Трамп на Азија, што беше најавена од Белата куќа, но засега не е потврдена.