Република Српска ќе одржи предвремени избори на 23 ноември, објави изборната комисија на БиХ, и покрај противењето на нејзиниот лидер Милорад Додик и регионалниот парламент.

Изборната комисија распиша избори за нов претседател на Република Српска во обид да ја реши кризата, откако на Додик му беше одземен претседателскиот мандат, но тој одби да се повлече. Додик кажа дека неговата партија Сојуз на независните социјалдемократи (СНСД) нема да учествува на овие избори.

„СНСД нема да излезе на изборите затоа што ги почитува заклучоците на Народното собрание на Република Српска“, кажа Додик, додавајќи дека не верува и дека коалициските партнери ќе учествуваат на изборите.

Собранието им забрани на сите органи и институции на РС да учествуваат на изборите на кој било начин.

Претходно, портпаролот на СНСД, Радован Ковачевиќ, изјави дека општите избори во БиХ се предвидени за следната година, а оваа година ќе се одржи референдум во Република Српска, на кој народот ќе им каже едно големо „не“ на високиот претставник во БиХ, Кристијан Шмит.

Во почетокот на овој месец, Централната изборна комисија на БиХ му го одзеде на Додик мандатот на претседател на Република Српска. Мандатот беше одземен по правосилната пресуда за непочитување на одлуките на високиот претставник во БиХ, за што Додик беше осуден на една година затвор, а доби и шестгодишна забрана на вршење јавна функција.