Володимир Зеленски назначи нов градоначалник на Одеса, откако на неговиот претходник Генадиј Труханов му беше одземено украинското државјанство, што доведе до негово автоматско разрешување.

Серхиј Лисак, кој досега беше гувернер на регионот Днипро, беше назначен ден по смената на Труханов, кого Украинската безбедносна служба го обвини дека поседува руско државјанство. Труханов го негираше ова и кажа дека ќе ја бара правдата на суд.

Лисак ќе ја води новоформираната воена управа на Одеса, вообичаена пракса откако почна војната во Украина, што на претседателот му дава поголема надлежност над локалните власти. Поради воената состојба во земјата, не е можно да се одржуваат избори.

Труханов првпат беше избран за градоначалник во 2014. Тој се изјасни против украинското движење за „дерусификација“, што започна во 2014, кога Русија го анектираше полуостровот Крим.