Речиси еден месец откако крадци украдоа накит во вредност од 88 милиони евра од славниот музеј Лувр, францускиот министер за внатрешни работи не се откажува од надежта дека пленот може да се врати.

„Сè додека немаме доказ дека е продаден, останувам уверен“, изјави министерот Лоран Нуњез.

Тој истакна дека властите веројатно фатиле тројца од четворицата членови на бандата што го ограби музејот. До денес се уапсени неколку осомничени, а во тек се прелиминарни истраги против тројца мажи наводно вмешани во кражбата и една жена за помагање и поттикнување.

Грабежот на 19 октомври беше светска сензација. Маскираните мажи паркирале камион до музејот, кој бил опремен со платформа за кревање која обично се користи за внесување мебел во становите во Париз. Додека двајца од сторителите чекале на улицата со скутери, другите двајца ја користеле платформата за кревање за да стигнат до балконот на првиот кат и оттаму влегле во музејот низ прозорец, каде што им се заканувале на вработените. Крадците избегале со скутерите со осум скапоцени парчиња накит што им припаѓале на поранешни кралици и царици, меѓу кои и тијари, ѓердани, обетки и брошеви украсени со скапоцени камења.

Круната на царицата Евгенија (1826-1920), украсена со смарагди и стотици дијаманти, исто така беше меѓу пленот, но подоцна беше пронајдена оштетена во близина на Лувр откако сторителите ја изгубија за време на бегството. Надвор од материјалната вредност на украдениот накит, француските министерства за внатрешни работи и за култура изјавија дека тој има „непроценлива културна и историска вредност“.