Украина кажа дека погодила два танкера што Русија ги користи за превоз на нафта за да ги избегне западните санкции. Нападот со поморски дронови бил изведен во Црното Море, кажа функционер на Украинската безбедносна служба (СБУ), која соработувала во акцијата со украинската морнарица.

Турските власти потврдија дека имало експлозии на два брода од руската флота во сенка во близина на Босфор, при што тие се запалиле.

СБУ кажа дека бродовите „Каирос“ и „Вират“ биле празни и дека пловеле кон пристаништето во рускиот град Новоросијск, каде што се наоѓа голем нафтен терминал.

„Видеоснимката покажува дека откако биле погодени, двата танкера претрпеле критична штета и ефикасно биле отстранети од употреба. Ова ќе нанесе значителен удар врз рускиот транспорт на нафта“, рекоа од СБУ.