Довчерашниот шеф на кабинетот на Володимир Зеленски, Андриј Јермак, кажа дека ќе оди на фронт и ќе се бори за Украина откако вчера поднесе оставка среде големиот корупциски скандал во земјата. Јермак, кој важеше за вториот највлијателен човек во Украина, поднесе оставка неколку часа откако антикорупциските агенции извршија претрес во неговиот дом, иако против него не се покренати обвиненија.

„Ме осквернавија, а моето достоинство не е заштитено. Затоа, не сакам да му правам проблеми на Зеленски, одам на фронт“, изјави Јермак за „Њујорк пост“.

Тој се најде под силен притисок на јавноста поради корупцискиот скандал во енергетскиот сектор во земјата. Двајца министри беа сменети по откривањето на корупциската шема од 100 милиони долари, раководена од некогашниот деловен партнер на Зеленски, Тимур Миндич, кој избегал од земјата.

„Згрозен сум од валканите зборови упатени кон мене, а уште повеќе од недостигот на поддршка од оние кои ја знаат вистината. Можеби повторно ќе се видиме“, рече Јермак.

Јермак беше главниот украински преговарач во актуелните мировни разговори со САД и Зеленски на негово место го назначи Рустем Умеров, секретарот на Советот за национална безбедност и одбрана.