Судот за воени злосторства во Хаг го одби барањето за предвремено пуштање на слобода на тешко болниот Ратко Младиќ, 84-годишниот генерал на босанските Срби, осуден за геноцид и злосторства против човештвото. Младиќ служи доживотна казна затвор во притворската единица во Хаг.

Тој поднел барање за предвремено пуштање врз основа на хуманитарни причини, зашто се наоѓа во напредна фаза на болест. Судот го одби барањето, иако потврди дека Младиќ се наоѓа во последните фази од животот и ја опиша неговата состојба како тешка.

„Условите во затворот му обезбедија максимална удобност, а самиот притвор не ја влоши ситуацијата. Нема дополнителен третман достапен на друго место што не е достапен во Холандија. Младиќ продолжува да добива сеопфатен и сочувствителен третман од квалификувани лекари, медицински сестри и затворски персонал“, соопшти судот.

Младиќ страда од когнитивни нарушувања и бил хоспитализиран многупати, според претходните судски документи и сослушувања.

Тој ги предводеше силите на босанските Срби за време на војната во БиХ. Беше осуден по обвиненијата за геноцид, злосторства против човештвото и воени злосторства, вклучително и тероризирање на цивилното население во Сараево и убиство на повеќе од 8.000 муслимански мажи и момчиња во Сребреница во 1995 година.