Доналд Трамп изјави дека преку посредници разговарал со либанската милиција Хезболах и дека обезбедил ветување дека нема да го напаѓа Израел. Тој рече дека разговарал и со израелскиот премиер Бенјамин Нетанјаху, тврдејќи дека Израел се согласил да ги повлече сите трупи што се подготвуваат да го нападнат јужен Либан.

Ова следува откако иранските медиуми објавија дека прекинот на огнот склучен помеѓу САД и Иран во април веројатно ќе заврши ако продолжат израелските напади врз Либан. Нетанјаху денеска нареди напади врз јужните предградија на Бејрут, кои важат за упориште на Хезболах.

Ниту еден американски претседател досега не разговарал со Хезболах, со или без посредници. Групата е означена како терористичка организација од страна на САД.

„Имав многу продуктивен разговор со израелскиот премиер Биби Нетанјаху и војници нема да одат во Бејрут, а сите војници кои се на пат веќе се вратени. Исто така, преку високо рангирани претставници имав многу добар разговор со Хезболах и тие се согласија дека пукањето ќе престане“, напиша Трамп на својата социјална мрежа.

Либански функционер изјави за „Ројтерс“ дека Хезболах ги информирал САД преку претседателот на либанскиот парламент Набих Бери дека е подготвен да ги запре нападите врз северен Израел ако Израел ги поштеди Бејрут и неговите предградија од какви било напади.

Израел изврши само два напада врз јужните предградија на Бејрут откако Трамп објави прекин на огнот во Либан на 16 април, иако во меѓувреме продолжија борбите на југот на земјата. Нетанјаху вчера ѝ нареди на израелската војска да ги прошири своите копнени маневри во Либан, со цел да преземе контрола врз местата што се под контрола на Хезболах.