Украина соопшти дека погодила пет брода што превезувале нелегален товар во Азовското Море и во крајбрежните води на териториите окупирани од Русија. Командантот на украинските беспилотни летала Роберт Бровди рече дека бродовите биле вклучени во крадење на украинско жито и во превезување на воен товар и гориво.

Нападите се случија пред рускиот претседател Владимир Путин да зборува на голем економски настан во Санкт Петербург.

Бровди кажа дека пет нелегални пловила биле погодени во пристаништата во Мариупол и Бердјанск и во крајбрежните води на окупираните територии.

„Меѓу нив се товарни бродови и танкери, кои биле префарбани и нивните радари биле исклучени заради кражба на украинско жито и пренесување на воен товар и гориво“, рече Бровди.

Не е јасно дали нападите врз товарните бродови се поврзани со смртта на петмина Азербејџанци, за кои Министерството за надворешни работи на земјата соопшти дека загинале во напади врз бродови. Тоа кажа дека бродовите „Натра“ и „Зиркон“ биле нападнати со беспилотни летала ноќеска во областа на Таганрошкиот Залив во Азовското Море, додавајќи дека бродовите не му припаѓаат на Азербејџан.