НАСА ги објави имињата на четворицата астронаути кои ќе учествуваат во следната мисија „Артемис 3“, клучен двонеделен лет чија цел е тестирање на различни технологии што се сметаат за неопходни за враќање на астронаути на површината на Месечината за првпат по повеќе од 50 години.
Екипажот, чије лансирање е планирано најрано кон крајот на 2027, го сочинуваат тројца астронаути на НАСА: Андре Даглас, кој првпат ќе лета во вселената, рекордерот по престој во вселената Френк Рубио и искусниот астронаут и тест-пилот Ренди Бресник, како и италијанскиот астронаут Лука Пармитано од Европската вселенска агенција.
„Артемис 3“ е замислена како подготвителна мисија за слетување на Месечината, при што ќе се тестира начинот на кој вселенското летало „Орион“, изградено од НАСА, како ќе се спојува со месечев лендер. Главната цел на летот, според вселенската агенција, е да се „намали ризикот“ пред вистинско слетување на Месечината, кое НАСА се надева дека ќе се случи најрано во 2028 .
За да стигнат до површината на Месечината, астронаутите ќе мора да изведат такво спојување додека се наоѓаат во месечева орбита. Но, во рамките на „Артемис 3“, НАСА планира маневарот да го тестира многу поблиску до Земјата, во ниска Земјина орбита (LEO), регионот најблизок до нашата планета, каде што се наоѓа и работи Меѓународната вселенска станица.
Екипажот на „Артемис 3“ ќе полета од Флорида со капсулата „Орион“, истиот тип летало што во април ја реализираше историската мисија „Артемис 2“, при која беше извршен прелет околу Месечината, а потоа ќе остане во ниска Земјина орбита.
Најмалку еден месечев лендер потоа ќе биде лансиран одделно, а сè уште не е јасно дали тоа ќе биде „Старшип“ на „СпејсЕкс“, „Блу Мун“ на „Блу Ориџин“ или и двете летала. По пристигнувањето во ниската Земјина орбита, лендерите ќе се сретнат со „Орион“, овозможувајќи им на астронаутите да се спојат со леталото и потенцијално да се префрлат во лендерот.
НАСА објави дека е можно тест-летот да се изведе и со „Блу Мун“ и со „Старшип“, иако не е јасно кога точно двете летала ќе бидат подготвени. Во последните месеци агенцијата вложува напори да ја поттикне конкуренцијата меѓу компаниите, кои веќе со години имаат договори во милијарди долари со НАСА за развој на лендери способни да превезуваат екипаж до Месечината. И двете компании се соочија со технички проблеми и одложувања во развојот.
