Со години, јапонските фудбалски навивачи добиваа пофалби за чистење на стадионите по натпреварите од светското првенство. Но, сега дома ги критикуваат.

Кога оваа недела се појавија фотографии од јапонски навивачи кои ги чистат трибините по натпреварот со Холандија, некои забележаа двоен стандард: мажи кои чистат јавно, додека дома тоа им го оставаат на своите сопруги. Набргу потоа, се прошири еден јапонски постер, на кој истиот маж е прикажан како собира ѓубре на стадионот, а дома седи на софа, додека неговата сопруга ги мие садовите.

„Мажите во Јапонија треба да придонесат повеќе дома, бидејќи нивното време поминато во домашни работи е меѓу најкратките во светот“, пишуваше во текстот на постерот.

„Веројатно има барем еден човек меѓу овие кои собираа ѓубре кој има мало дете дома и ја оставил сопругата да се грижи за него додека тој е на Светското првенство“, напиша една корисничка на Икс.

Чистотата и чистењето на јавни места се длабоко вкоренети во јапонската култура. Сепак, во однос на времето поминато во домашни работи, јапонските мажи се рангираат најниско меѓу високоразвиените земји.

Според податоците на Организацијата за економска соработка и развој од 2021 година, Јапонките поминуваат повеќе од три часа дневно на неплатена работа, над петпати повеќе од мажите, кои на тоа трошат 47 минути на ден.

Некои корисници на социјалните медиуми, исто така, укажаа на лицемерието во собирањето ѓубре во странство, кога јавните простори во Јапонија честопати се преполни со ѓубре по големите настани.