Татко и неговиот син се извлечени живи од урнатините на зграда, четири дена по катастрофалните земјотреси во Венецуела. Тоа им даде надеж на француските и американските спасувачи кои се активни во тешко погодената област Ла Гварија, додека се тркаат со времето да пронајдат повеќе преживеани.

Досега е потврдено дека загинале најмалку 1.450 луѓе, но илјадници и натаму се водат како исчезнати. Најмалку 33 луѓе беа спасени викендов, додека истекува времето за пронаоѓање преживеани. Според специјалистите, шансите за пронаоѓање живи под урнатините драматично се намалуваат 72 часа по земјотресот.

Меѓу спасените викендов се и две 11-годишни момчиња и жена со нејзиното новороденче. Дајана Патино кажа дека нејзиниот син Хуан Давид, кој бил роден пред само 18 дена, ѝ давал мотивација да остане смирена и будна.

Повеќе од 2.500 станбени згради и други објекти се целосно урнати или сериозно оштетени (Фото: ДПА)

Веднаш по земјотресите со јачина од 7,2 и 7,5 степени според Рихтеровата скала, Американскиот геолошки институт процени дека би можело да има над 10.000 жртви, па дури и 100.000. Владата на Венецуела досега не излегла со своите проценки за вкупниот број жртви, но десетици илјади луѓе и натаму се водат како исчезнати. Според една цивилна мрежа за следење исчезнати, со над 46.000 луѓе не можело да се стапи во контакт. Претседателката Делси Родригес ги опиша земјотресите како најбрутална природна катастрофа во историјата на земјата,

Според најновата проценка на штетите, повеќе од 2.500 станбени згради и други објекти се целосно урнати или сериозно оштетени, вклучувајќи околу 780 домови и 38 болници.