Чекорењето се поврзува со подобро здравје и англиската Национална здравствена служба (НХС) за првпат ќе им дава награди на луѓето за оваа активност. На почетокот на следната година, НХС ќе започне предизвик „месечен маратон“, барајќи од луѓето да пешачат околу 30 минути на ден.

Оние кои ќе го прават тоа секој ден ќе достигнат приближно 42 километри месечно, што е растојанието на маратон. Корисниците ќе можат да ги евидентираат своите прошетки онлајн или преку нивниот телефон или паметен часовник.

НХС вели дека оние кои ќе го завршат предизвикот ќе имаат право на награди, што би можело да вклучува стимулации и попусти.

Програмата, која е дел од 10-годишен здравствен план за Англија, се развива во партнерство со освојувачот на олимписки медал во атлетика Брендан Фостер, од кого НХС побара да започне кампања за да ги поттикне луѓето да пешачат.

„Познат сум по трчањето, но амбицијата овде е многу поедноставна. Ние само сакаме луѓето да одат. Мојата мисија е да направам повеќе луѓе активни“, изјави Фостер.

Физичката неактивност е поврзана со еден од шест смртни случаи, според НХС. Едно лице се класифицира како физички неактивно ако има помалку од 30 минути физичка активност со умерен интензитет неделно.

„Целта е да се пријават повеќе од 100.000 луѓе, со дневна статистика за евидентирање. Доколку целта се постигне, тоа би се сметало за најголемиот маратон во историјата“, рече Фостер.