Сем Нил, разновидниот новозеландски актер чија кариера опфати добитници на Оскар и блокбастери како „Пијано“ и „Паркот Јура“, почина на 78-годишна возраст.

Смртта на Нил беше објавена преку соопштение споделено на неговиот инстаграм профил. Не е наведена причината за смртта, но Нил неодамна откри дека е излекуван откако му беше дијагностициран еден вид на рак на крвта во 2022 година.

„Загубата беше ненадејна и неочекувана, но благословена од фактот што Сем веќе немаше рак. Повеќе детали ќе бидат споделени подоцна“, се вели во соопштението.

Нил е роден во 1947 година во Северна Ирска, но со семејството се преселил во Нов Зеланд во 1954. Актерската кариера ја почнал во универзитетски продукции додека студирал право, по што станал професионален актер во театар.

По неколку мали телевизиски улоги, пробивот го направил во 1977 со „Sleeping Dogs“, првиот новозеландски филм прикажан во американски кина. Потоа имаше главни улоги во хорорите „Omen 3“ и „Possession“ и во „Ајванхо“, што го направи познато име во Шведска, зашто овој филм се прикажуваше на телевизија секоја Нова година четири децении.

Нил се здоби со поширока меѓународна популарност со два филма од 1993 година, оскаровецот „Пијано“ и „Паркот Јура“ и изгради кариера играјќи и романтични главни ликови и харизматични негативци. Тој оствари повеќе од 150 улоги во текот на пет децении.

Новите генерации го запознаа преку помали улоги во филмовите за Тор и како корумпираниот полициски началник Честер Кембел во серијата „Пики блајндерс“.