Иран побарал од движењето хути во Јемен да биде подготвено да го затвори нафтениот пат до Црвеното Море доколку САД ја нападнат иранската енергетска инфраструктура, како што се закани Доналд Трамп, изјавија три извори за „Ројтерс“, Идејата била дискутирана од раководството на Исламската Република и пораката била пренесена до сојузниците во Јемен, изјавија изворите запознати со ова прашање.

Извор близок до хутите изјавил дека групата ги завршила подготовките за напад врз бродови, распоредувајќи ракети и беспилотни летала во близина на теснецот Баб ел-Мандеб, на висорамнините со поглед на Ходеида и Аденскиот Залив и чека наредба за почеток.

Во услови кога Ормускиот Теснец е веќе затворен, сите напади врз бродови или пристаништа во Црвеното Море би ги прекинале истовремено двете главни рути за извоз на нафта од Блискиот Исток, отворајќи нов фронт и во енергетската криза и во поширокиот конфликт помеѓу Иран и САД.

Иранската револуционерна гарда, чии претставници веќе се во Јемен, ќе ја контролира одлуката кога да се затвори теснецот Баб ел-Мандеб, изјави извор близок до хутите.

Хутите пред неколку дена испукаа ракети кон Саудиска Арабија откако ја обвинија за бомбардирање на аеродром под нивна контрола, со што беше прекршено четиригодишното примирје во нивниот конфликт.