Доналд Трамп одобрил договор со Саудиска Арабија кој потенцијално би можел да ѝ обезбеди капацитет за збогатување ураниум за неговата цивилна нуклеарна програма, изјавија за новинската агенција „АП“ две лица запознати со ова прашање. Според нив, се очекува договорот да биде јавно објавен наскоро.

Договорот треба да трае 30 години и да вклучи и американски фирми во развојот на програмата. Тој би можел да овозможи изградба на објект за збогатување ураниум по заедничка студија на САД и Саудиска Арабија.

Но, договорот би можел да се соочи со пречки во американскиот Конгрес, зашто некои пратеници стравуваат дека помагањето на Саудијците да ја исполнат својата долгогодишна желба да збогатуваат ураниум би отворило нови рунди на нуклеарен натпревар.

Саудиска Арабија е членка на Меѓународната агенција за атомска енергија во Виена, која промовира нуклеарен развој за мирни цели, но исто така врши инспекции во земјите за да се осигури дека немаат тајни програми за атомско оружје.

Овој договор се случува среде американската војна против Иран, започната за да се спречи Техеран да развие нуклеарно оружје.