Од откривањето на првите светови надвор од нашиот сончев систем во 1990-тите години, астрономите потврдија постоење на повеќе од 6.000 егзопланети во каталогот на НАСА. Сепак, природните сателити што кружат околу овие светови, познати како егзомесечини, остануваат недостижни и досега нема ниту една официјално потврдена детекција, иако научниците се убедени дека тие постојат во другите ѕвездени системи.

Со помош на Многу големиот телескоп (VLT), истражувачки тим забележа необичен објект во ѕвездениот систем ЦД-35 2722, сместен на околу 73 светлосни години од Земјата. Ова откритие дополнително ги компликува научните сфаќања бидејќи станува збор за тело кое би можело да биде егзомесечина, или пак објект што ќе бара целосно преиспитување на дефинициите за тоа што претставува планета, а што месечина.

Ѕвездата ЦД-35 2722 е за половина помала од Сонцето и околу неа кружи кафеаво џуџе, односно неуспешна ѕвезда која не успеала да собере доволно маса за да започне фузија на водород во хелиум. Овие тела имаат маса од 13 до 80 пати поголема од Јупитер.

Новооткриениот објект има карактеристики на месечина, но наместо да кружи околу планета, тој се движи во орбита околу кафеавото џуџе.

Според раководителот на истражувачкиот тим Кевин Хој од Универзитетот Диего Порталес и Милениумскиот нуклеус за млади егзопланети и нивни месечини од Чиле, овој систем тешко се дефинира со стандардните термини од сончевиот систем. Овој егзосателит има доволно голема маса за да биде класифициран како планета, но не кружи директно околу ѕвезда, туку околу објект кој самиот се движи во нејзина орбита.