Реката Рајна падна на рекордно ниско ниво на неколку локации во Германија и Холандија, додека долгите топлотни бранови продолжуваат низ Европа. Нивоата измерени во Келн во западна Германија и во Лобит, каде што Рајна преминува од Германија во Холандија, се најниски откако се водат евиденции.

И други големи европски реки со важни транспортни, индустриски и земјоделски функции забележаа рекордно низок водостој, вклучувајќи го Дунав, кој тече низ 10 земји и италијанската река По.

Сушата останала стабилна и критична во поголемиот дел од Европа и се влошила во централно-западната Европа кон средината на јули, според опсерваториите за суша на ЕУ. Се очекува топлотниот бран да продолжи најмалку уште една недела, кревајќи ги температурите над 40 степени во многу земји од централна и јужна Европа.

Германскиот информативен систем за низок водостој соопшти дека 44% од мерните станици на Рајна и 78% од оние на Дунав регистрирале екстремно ниски нивоа на вода на крајот на јули. Рајна, која извира во швајцарските Алпи и се влева во Северното Море, е еден од најпрометните водни патишта во Европа.

Германските власти велат дека е малку веројатно дека бродскиот сообраќај по Рајна ќе биде целосно суспендиран, но ќе треба да се преземат мерки на претпазливост, како што е распределба на товарот на повеќе бродови за да бидат помалку тешки.

Минатата недела, водостојот на Дунав падна на најниско ниво во последните 30 години во неколку земји, вклучувајќи ги Србија и Романија, оставајќи ја единствената нуклеарна централа во Унгарија на работ на затворање. Сушата на Дунав, исто така, предизвикува сериозни прекини во снабдувањето со електрична енергија во Србија и Романија. Со контролирана експлозија на голема карпа на брегот на Дунав, Романија се обиде да го зголеми протокот на вода до нуклеарната централа Чернавода.

Две фабрики за автомобили во Романија се согласија да го прекинат производството на повеќе од две недели за да ја намалат потрошувачката на струја.

Најдолгата река во Италија, По, го достигна најниското ниво во историјата во близина на северниот град Кремона кон крајот на јули. Властите прогласија високо ниво на тревога за суша низ целата долина на По.