На температура од над 30 степени Целзиусови, делови од Битола останаа без вода или со слаб притисок поради дефект на електричната мрежа во пумпната станица „Довлеџик“. Од Јавното претпријатие „Водовод“ соопштија дека привремено е запрено снабдувањето со сирова вода.

„Ова може да предизвика намалување на нивото во резервоарите, пад на притисокот, а во повисоките делови и прекин на водоснабдувањето“, велат од претпријатието.

Екипите на ЈКП „Водовод“ – Битола, во координација со надлежните институции, работат на отстранување на дефектот.

Попладнево, дефектот предизвикан од струен удар беше отстранет, а надлежните соопштија дека целокупното водоснабдување ќе се врати во нормала.

Ж. ЗДРАВКОВСКА