Во Непал продолжува големата потрага по стотиците исчезнати луѓе два дена по катастрофалната поплава, предизвикана од уривањето на глечер во долина. Во исто време, кинеските власти ја прекинаа спасувачката акција во Тибет поради ризик од нови поплави.

Бројот на загинати порасна на најмалку 475, додека и натаму има околу 1.000 исчезнати.

Поплавата опустоши села и долини, уништувајќи електрани, патишта и мостови по должината на рутата што го поврзува Катманду со Ласа во Тибет и е популарна кај планинарите и аџиите. Од исчезнатите, најмалку 540 се странци.

Властите во Непал користат хеликоптери за да бараат преживеани и да испорачуваат помош до илјадници луѓе кои се отсечени во градовите и долините.

Непалските служби за управување со катастрофи предупредија дека езерото формирано од остатоци што ја блокираат реката Ботекоши се зголемува и постои опасност од пукање, додека од другата страна на границата, Кина соопшти дека се очекува околу три милиони кубици вода, еквивалент на околу 1.200 олимписки базени, да се влеат во веќе преграденото езеро во следните три дена. Постои голем ризик езерото да пукне, а врвот на протокот се очекува околу 1 септември, соопштија кинеските државни медиуми, повикувајќи се на Министерството за водни ресурси.

Кинеските власти мобилизираа осумчлен инженерски тим за да спроведе воздушни истражувања и 3-Д моделирање на езерото, но пристапот до него е предизвикувачки.

Кина денеска донесе одлука да ги прекине спасувачките напори во Тибет поради стравувања од понатамошни поплави. Повеќе од 550 лица се регистрирани како исчезнати на тибетската страна од границата, од кои 260 странци, вклучувајќи аџии кои оделе кон светата планина Каилаш.

Причината за уривањето на глечерот засега не е позната. Иако непалските власти кажаа дека претходно имало земјотрес, Геолошкиот завод на САД соопшти дека тресењето, всушност, била сеизмичка енергија создадена од уривањето на глацијалните карпи и мраз, проследено со проток на остатоци. Наглиот и разорен налет на вода и кал бил висок неколку метри.