Исланѓаните денеска на референдум ќе одлучат дали да ги продолжат разговорите за приклучување кон Европската Унија, 13 години откако беа прекинати. Се очекува резултатот да биде тесен, бидејќи најновата анкета на јавното мислење покажа дека 51,6% Исланѓани се против.

Централно-левичарската влада на Криструн Фростадотир имаше намера да одржи референдум, но турбулентните меѓународни случувања ја натераа да го убрза. Дебатата се водеше помалку за безбедносните загрижености на Исланд, кој е член на НАТО, а повеќе за неговите витална рибарска индустрија и суверенитет. Резултатот се очекува утре наутро.

Исланд има помалку од 400.000 жители и е една од најбогатите земји во Европа. Иако земјата е веќе дел од единствениот пазар на ЕУ и Шенген зоната, членството во ЕУ би ја довело во царинската унија и на крајот, во еврозоната.

Апликацијата на Исланд за членство во ЕУ веќе беше во напредна фаза кога преговорите беа ставени во мирување во 2013, а претставници на Европската комисија посочија дека разговорите би можеле да бидат финализирани за една или две години. Од 35-те поглавја во разговорите, 27 беа започнати, а 11 беа привремено завршени.

Суверенитетот беше клучно прашање во дебатата пред референдумот. Исланд се бореше напорно за да стане целосно независен од Данска во 1944, а неговата рибарска и морска индустрија сочинуваат речиси 40% од извозот. Рибарството отсекогаш бил проблемот што го спречувал Исланд да се приклучи на ЕУ.

Исланд е еден од основачите на НАТО, но нема своја војска. Противниците на приклучувањето велат дека безбедноста на Исланд се потпира на НАТО и САД, а членството во ЕУ не е замена за НАТО.