Иран и САД разменија напади откако американските сили нападнаа два ракетни лансера на островот Ларак во Ормускиот Теснец. Во првите познати американски напади од крајот на јули загинале две лица, според Иранската револуционерна гарда, која вети одговор и казна и соопшти дека соборила американски дрон над Ормускиот Теснец.

Централната команда на САД соопшти дека извршила „ограничена, прецизна акција против силите за поставување мини во Ормускиот Теснец“. Иран одговори со напад врз американските бази во Јордан, соопштија државните медиуми. Јорданската армија кажа дека утрово пресретнала осум ракети.

Неколку часа по нападот, Доналд Трамп објави видеа со вештачка интелигенција (ВИ), на кои се гледа како експлодира нафтена инфраструктура. Едно од нив имаше наслов „Островот Харг е разнесен на парчиња“, алудирајќи на голем нафтен терминал покрај брегот на Иран, што Трамп се закани дека ќе го заземе. Во неговата објава немаше детали.

Ова е првиот американски напад откако Трамп ја паузираше воената кампања на крајот на јули. Иран кажа дека САД користеле дронови.

„Нападот е стратешка и фатална грешка на режимот на Трамп. Непријателот ќе ги плати последиците на оваа погрешна пресметка“, рече портпаролот на Иранската гарда, Хосеин Мохеби.
Иранскиот претседател Масуд Пезешкијан изјави дека Иран не бара војна, но решително ќе им одговори на агресорите.