Спасувачките екипи работат на тоа да стигнат до повеќе од 900 луѓе за кои се смета дека се заробени во тунелите и подземните области на неколку хидроенергетски проекти во Непал по катастрофалните поплави.
Бројот на жртви на невидениот потоп од мраз, карпи, кал и остатоци, што се урнаа низ долините на Непал во средата, се искачи на 903, а има и 16 мртви на тибетската страна од границата. Повеќе од 4.000 се водат како исчезнати во Непал и уште 500 во Тибет. Стотици тела, многу од нив неидентификувани, се закопани во плитки гробови во рамнините на хималајскиот регион.
Непалските власти денеска изјавија дека потрагата ја фокусираат на 933 лица кои се водат како исчезнати во хидроенергетските проекти во регионот погоден од поплавите.
„Голема количина отпад е насобрана и тоа ни претставува голем предизвик да ги отвориме тунелите“, изјави портпаролот на непалската армија Раџа Рам Баснет.
Тимот на Ашиш Гурунг, кој вообичаено работи како водич, вчера се обидуваше да пристапи до хидроцентралата во Чилиме во Русвана, која е најтешко погодена област.
„Има само кал насекаде. Внатре во тунелот беше полошо. Движењето е тешко, калта е многу длабока. Во еден момент ни беше до градите. Се приближивме до првата станица, околу 130 метри навнатре, изгледаше како внатре да се само тела“, рече Гурунг.
Тие добиле мапа од хидроенергетската компанија и Гурунг кажа дека има шанса луѓето во тунелите да преживеале ако останеле во внатрешната инфраструктура.
Црвениот крст процени дека повеќе од 90.000 луѓе се погодени од катастрофата, која Кина ја поврза со климатската криза. Непалскиот премиер Балендра Шах рече дека поплавата е невидена и разорна природна катастрофа и дека е предизвик да се направи целосна проценка на штетата.
„И покрај неповолните временски услови, тешкиот терен и континуираните ризици, продолжуваме со спасувањето на нашите граѓани. Речиси 21.000 припадници на безбедносните сили се вклучени во спасувачките операции, покрај цивилните работници и волонтерите“, изјави Шах.
Непалската агенција за катастрофи соопшти дека во земјата има 903 смртни случаи, а 4.247 лица, вклучувајќи 592 странци, се водат како исчезнати. До вчера, кинеските власти објавија 16 смртни случаи и 546 исчезнати, од кои 261 странец.
