Наместо во септември, на крајот на октомври треба да бидат готови просториите на Националниот џез оркестар (НЏО), кои се наоѓаат под објектот на Националната опера и балет (НОБ), вели Министерството за култура и туризам. Станува збор за современ и функционален простор од околу 500 квадратни метри, каде што ќе има голема сала за вежбање на Оркестарот, која ќе биде поврзана со тонско студио, гардероби, канцеларии и други помошни простории.

Претходниот министер за култура Зоран Љутков и директорот на Оркестарот, Гоце Стевковски, на 27 мај го посетија просторот кој се реновира и најавија дека работите ќе бидат завршени во септември. На прес-конференцијата на 14 септември за новата сезона и гостувањата, Стевковски рече дека прашањето за добивањето на сопствен простор треба да се упати до Министерството за култура, бидејќи тие располагаат со просториите и го контролираат процесот на реализација.

• БЕЗ СОПСТВЕНИ ПРОСТОРИИ НЕ МОЖЕМЕ ДА ГИ РЕАЛИЗИРАМЕ СИТЕ ИДЕИ, ВЕЛАТ ОД НАЦИОНАЛНИОТ ЏЕЗ ОРКЕСТАР, КОЈ НАЈАВИ СЕРИЈА КОНЦЕРТИ И ИЗДАВАЊЕ АЛБУМ
• ПО 2 ГОДИНИ РАБОТА, ЗА ТРИ МЕСЕЦИ ТРЕБА ДА ЗАВРШИ АДАПТИРАЊЕТО НА ПРОСТОРИИТЕ ЗА НАЦИОНАЛНИОТ ЏЕЗ ОРКЕСТАР

Од Министерството за култура за САКАМДАКАЖАМ.МК велат дека реновирањето и опремувањето на просториите на Националниот џез оркестар се во завршна фаза.

„За реализацијата на проектот, Министерството за култура и туризам обезбеди средства за реновирање и опремување на просторот, со цел оркестарот да добие соодветни услови за работа и проби. Работите, кои согласно првичната динамика беше предвидено да завршат во септември, се во завршна фаза. Се очекува реновирањето да биде комплетно завршено до крајот на октомври. Министерството за култура и туризам останува посветено на создавањето соодветни услови за работа на Националниот џез оркестар. Обезбедувањето сопствени простории за проби и работа претставува значаен чекор за институцијата и за понатамошниот развој на оркестарот. Кога музичарите имаат свој простор за проби, соодветни услови и стабилна инфраструктура, многу е полесно да работат со полна пареа, да ја развиваат својата програма и да создаваат нови уметнички проекти“, велат од Министерството.

Основниот проект за реновирање и уредување на овие простории е изработен во 2023 од „Мегарон-инженеринг“. Првата фаза е реализирана во согласност со договорот помеѓу Владата, „ТАВ Македонија“, „Тав Тепе Акфен“ и Министерството за култура и туризам и е во вредност од 10 милиони денари (над 160.000 евра).

Џез оркестарот е основан со одлука на Владата во март 2023, на иницијатива на Здружението на џез музичари и слободни уметници. Националниот џез оркестар во март 2024 го доби просторот под Националната опера и балет.

Б. НЕСТОРОСКА